இந்தோனேசியாவில் சக்திவாய்ந்த நிலநடுக்கம்..

இந்தோனேசியாவில் சக்திவாய்ந்த நிலநடுக்கம் ஏற்பட்டுள்ளது. இதனால், பீதியடைந்த மக்கள் வீதிகளில் தஞ்சம் அடைந்தனர்.

சுமத்ரா மாகாணத்தில் தென்கிழக்குப் பகுதியில் உள்ள மென்ட்டவாய் தீவை மையமாக கொண்டு இந்த நிலநடுக்கம் தாக்கியது. ரிக்டர் அளவுகோலில் 5.8 புள்ளிகளாக பதிவான‌ இந்த நிலநடுக்கம் பூமிக்கு அடியில் 29 கிலோ மீட்டர் ஆழத்தில் மையம் கொண்டுள்ளது.

சில வினாடிகள் நீடித்த நிலநடுக்கத்தின் போது வீடுகள் கடைகள் உள்ளிட்ட கட்டிடங்கள் பயங்கரமாக குலுங்கின. பீதியடைந்த மக்கள் அலறியடித்தபடி வீடுகளை விட்டு வெளியேறி வீதிகளில் தஞ்சமடைந்தனர்.

நிலநடுக்கத்தால் உயிரிழப்பு ஏற்பட்டதாகவோ அல்லது யாரும் காயம் அடைந்ததாகவோ உடனடி தகவல்கள் இல்லை. நிலநடுக்கம் காரணமாக சுனாமி எச்சரிக்கை எதுவும் விடுக்கப்படவில்லை.