நடிகர் ஜெயம் ரவி நடித்துள்ள பூமி திரைப்படம் பொங்கல் விருந்தாக OTT தளத்தில் வெளியாக இருப்பதாக அறிவிக்கப்பட்டது.
இதுகுறித்து நடிகர் ஜெயம் ரவி வெளியிடும் செய்திக்குறிப்பில், “எனது நீண்ட திரைப்பயணம் முழுக்க, முழுக்க ரசிகர்களாகிய உங்களால் ஆனது. நீங்கள் அளித்த அளவற்ற அன்பு, என் மேல் நீங்கள் வைத்த மிகப் பெரும் நம்பிக்கை, நீங்கள் அளித்த உத்வேகம் தான் சிறப்பக படங்களில் நான் பணியாற்ற காரணம்.
எனது கடினமான காலங்களில் என்னை உங்களின் சொந்த ரத்தம் போலவே நினைத்து ஆதரளித்தீர்கள். உங்களின் இந்த ஆதரவே சினிமா மீதான எனது காதலை நிலை பெறச் செய்தது. நீங்கள் இல்லாமல் என்னால் இத்தனை தூரம் வெற்றிகரமாக பயணித்து இருக்க முடியாது. உங்களை எனது குடும்பத்தினர் ஆகவே கருதுகிறேன்.
“பூமி” திரைப்படம் எனது சினிமா பயணத்தில் ஒரு மைல்கல். இப்படம் எனது திரைப்பயணத்தில் 25வது படம் என்பதை தாண்டி என் மனதிற்கு மிகவும் நெருக்கமான படம். கோவிட் காலத்தில் ரிலீசாகும் படங்களின் வரிசையில் இப்படமும் இணைந்திருக்கிறது. உங்களுடன் இணைந்து திரையரங்கில் இப்படத்தை ரசிக்க நினைத்தேன். ஆனால், காலம் வேறு ஒரு திட்டம் வைத்து இருக்கிறது.
இப்படம் உங்கள் இல்லம் தேடி உங்கள் வரவேற்பறைக்கு வர உள்ளது. Disney+Hotstar-ருடன் இணைந்து உங்களின் 2021 பொங்கல் கொண்டாட்டத்தில் பங்கு கொள்வதில் நான் பெருமை கொள்கிறேன். நிறைய பண்டிகை காலங்களில் திரையரங்கில் வந்து எனது திரைப்படத்தை பார்த்து பண்டிகையை கொண்டாடி உள்ளீர்கள்.
இந்த பொங்கல் பண்டிகை தினத்தில் எனது அழகான திரைப்படத்துடன் உங்கள் வீட்டில் உங்களை சந்திப்பதை ஆசீர்வாதமாக கருதுகிறேன். பெரும் அன்புடன் நிறைய நம்பிக்கையுடன் என் திரைப்படத்துடன் உங்களை திரையரங்கில் சந்திக்க காத்திருக்கிறேன்.” என்று தெரிவித்துள்ளார்.
