இந்தியா-இலங்கை இடையே காந்தி தபால்தலை பரிமாற்றம்

நிகழ்ச்சியில் இலங்கை துணை தூதர் வடிவேல் கிருஷ்ணமூர்த்தி, தமிழக தலைமை தபால்துறை அதிகாரி எம்.சம்பந்த், மண்டல பாஸ்போர்ட் அதிகாரி பி.கே.அசோக்பாபு ஆகியோர் சிறப்பு விருந்தினர்களாக பங்கேற்றனர்.

காந்தி ஜெயந்தியன்று இந்தியா-இலங்கை அரசு சார்பில் தனித்தனியாக வெளியிடப்பட்ட அவருடைய தபால்தலை-உறையை இலங்கை துணை தூதர் வடிவேல் கிருஷ்ணமூர்த்தியும், தலைமை தபால்துறை அதிகாரி எம்.சம்பந்தும் பரிமாற்றம் செய்து கொண்டனர்.

இலங்கை துணை தூதர் வடிவேல் கிருஷ்ணமூர்த்தி பேசும்போது, ‘இந்தியா-இலங்கை இடையே நல்லுறவை பேணிக்காக்கும் வகையில் நல்லிணக்க அடிப்படையில் காந்தியின் தபால்தலை பரிமாறப்பட்டுள்ளது. காந்தியின் அகிம்சை போராட்டத்தால் இந்தியாவுக்கு மட்டுமின்றி இலங்கைக்கும் ஆங்கிலேயர்களிடம் இருந்து சுதந்திரம் கிடைத்தது’ என்றார்.

தலைமை தபால்துறை அதிகாரி எம்.சம்பந்த் பேசுகையில், ‘இலங்கை அரசு காந்தியை கவுரப்படுத்துவது இந்தியாவுக்கும், இந்தியர்களுக்கும் மிகச்சிறந்த கவுரவமாகும். இதற்காக இலங்கை அரசுக்கு நாங்கள் நன்றியை தெரிவித்துக்கொள்கிறோம்’ என்றார்.