இன்று நள்ளிரவு முதல் மண்ணெண்ணெயின் விலை குறைக்கப்படவுள்ளதாக நிதியமைச்சு அறிவித்துள்ளது.

இதற்கிணங்க, ஒரு லீற்றர் மண்ணெண்ணெயின் விலை 5 ரூபாவால் குறைக்கப்படவுள்ளதாக தெரிவிக்கப்பட்டுள்ளது.

இதன் படி ஒரு லீற்றர் மண்ணெண்ணெயின் புதியவிலை 44 ரூபாவாக குறைக்கப்பட்ட விலையில் விற்பனை செய்யப்படவுள்ளது.

2017 ஆம் ஆண்டுக்கான வரவு செலவுத் திட்ட முன்மொழிவுக்கு அமையவே இந்த நடவடிக்கை மேற்கொள்ளப்பட்டுள்ளமை குறிப்பிடத்தக்கது.

வடமாகாணத்தில் உள்ள அனைத்துப் பாடசாலைகளுக்கும் தைப்பொங்கல் தினத்திற்கு முன்தினமான எதிர்வரும் வெள்ளிக்கிழமை விடுமுறை வழங்கப்பட்டுள்ளது.

இவ்வாறு வழங்கப்படும் விடுமுறை தினத்திற்று பதிலாக எதிர்வரும் 21 ஆம் திகதி சனிக்கிழமை பாடசாலை இடம்பெறும் என வடக்கு மாகாணக் கல்வி அமைச்சரின் செயலாளர் இ.இரவீந்திரன் தெரிவித்துள்ளார்.

நாளை மறுதினமான 12 ஆம் திகதி பௌர்ணமி தின விடுமுறை நாளாக உள்ளதாலும், எதிர்வரும் 14 ஆம் திகதி தைப்பொங்கல் தினமாக அமைந்துள்ளதை கருத்திற் கொண்டும் வெள்ளிக்கிழமை (13) பாடசாலை விடுமுறை நாளாக அறிவிக்கப்பட்டுள்ளது.

அதற்குப் பதிலாக, எதிர்வரும் 21 ஆம் திகதி பாடசாலை தினமாக அறிவிக்கப்பட்டுள்ளதாக அவர் தெரிவித்துள்ளார்.

நாட்டைப் பிளவுபடுத்தும் அரசியல் அமைப்பு ஒன்றை கொண்டுவர நடவடிக்கை எடுக்கப்படுவதாக ஹம்பாந்தோட்டை மாவட்ட நாடாளுமன்ற உறுப்பினர் நாமல் ராஜபக்ஸ தெரிவித்துள்ளார்.

நாட்டின் பொருளாதாரம் வீழ்ச்சியடைந்துள்ளது. இந்த நிலையில், இவை குறித்து கருத்து வெளியிடும் நாடாளுமன்ற உறுப்பினர்கள் மீது வழக்குத் தொடரப்பட்டு கைது செய்யப்படுவதாக நாமல் ராஜபக்ஸ தெரிவித்துள்ளார்.

பொலிஸ் நிதி மோசடி விசாரணைப் பிரிவினரால் முன்னாள் அமைச்சர் விமல் வீரவன்ஸ கைது செய்யப்பட்டதையடுத்து, ஊடகங்களிடம் கருத்து வெளியிட்டபோதே அவர் இதனைத் தெரிவித்துள்ளார்.

யாழ். சுன்னாகம் நிலத்தடி நீர் மாசு தொடர்பான வழக்கினை எதிர்வரும் 23ஆம் திகதிக்கு ஒத்திவைக்குமாறு நீதவான் ஏ.யூட்சன் உத்தரவிட்டார்.

குறித்த பகுதியில் நிலத்தடி நீர் மாசடைந்துள்ளமை தொடர்பில் சுகாதார வைத்திய அதிகாரிகள் மற்றும் பொலிஸாரினால் தாக்கல் செய்யப்பட்ட வழக்கு விசாரணை இன்று மல்லாகம் நீதிமன்றத்தில் விசாரணைக்கு எடுத்துக்கொள்ளப்பட்ட போதே நீதவான் உத்தரவிட்டுள்ளார்.

சுன்னாகம் மற்றும் அதனை அண்டிய பகுதியில் கிடைக்கும் நிலத்தடி நீரினை குடிக்கலாமா, இல்லையா என்பது தொடர்பில் இதுவரை முறையான அறிக்கை எதுவும் நீதிமன்றில் சமர்பிக்கப்படவில்லை என நீதவான் ஏ.யூட்சன் தெரிவித்திருந்தார்.

பிரதேச வைத்திய அதிகாரிகள், சுகாதார பரிசோதகர்கள், மாவட்ட அனர்த்த முகாமைத்துவ பிரிவு அதிகாரிகள் மற்றும் வட மாகாண விவசாயத்துறை அமைச்சர் பொ.ஐங்கரநேசன் ஆகியோர் நீதிமன்றில் ஆஜராகியிருந்தார்.

இந்நிலையில், சுன்னாகம் நிலத்தடி நீர் மாசு தொடர்பில் இதுவரை எதுவித ஆக்கப்பூர்வமான நடிவடிக்கைகளும் முன்னெடுக்கப்படவில்லை என மக்கள் விசனம் தெரிவித்துள்ளனர்.

மேலும் குறித்த விடையம் தொடர்பில் வட மாகாண விவசாய அமைச்சர் பொ.ஐங்கரநேசனுக்கு நீதிமன்றம் இருமுறை அழைப்பாணை விடுத்திருந்தமை குறிப்பிடத்தக்கது.

தற்போது நாட்டில் நல்லாட்சி வெள்ளத்தில் போயுள்ளதாக மஹிந்த அணியின் நாடாளுமன்ற உறுப்பினர் ரோஹித அபேகுணவர்தன தெரிவித்துள்ளார்.

பொலிஸ் நிதி மோசடி விசாணைப் பிரிவினரால் முன்னாள் அமைச்சர் விமல் வீரவன்ச கைது செய்யப்பட்டதையடுத்து, ஊடகங்களிடம் கருத்து வெளியிட்ட போதே அவர் இதனைத் கூறியுள்ளார்.

ஜனநாயகமும், நல்லாட்சியும் நாட்டு மக்களின் வயிற்றுக்கு, வாய்க்கும் நன்றாக விளங்கியுள்ளது.

நாட்டில் இடம்பெறும் அநீதிகள் தொடர்பில் கருத்து வெளியிடுபவர்களை பொலிஸ் நிதி மோசடி விசாரணைப் பிரிவு, குற்றப் விசாரணைப் பிரிவு ஆகியவற்றுக்கு அழைத்துச் செல்கின்றனர்.

இவ்வாறு தான் தற்போது நாட்டில் ஜனநாயகம் நிலவுகின்றது என நாடாளுமன்ற உறுப்பினர் ரோஹித அபேகுணவர்தன குறிப்பிட்டுள்ளார்.

பாராளுமன்ற உறுப்பினர் விமல் வீரவன்ச இன்று கைது செய்யப்பட்டுள்ளமை அரசியல் ரீதியான பழிவாங்கல் என்றே அவர் தரப்பு கூறுகின்றது.

இந்த நிலையில் இந்த கைது அரசியல் ரீதியான ஒரு நாடகமே. இது மகிந்த – ரணில் இணைந்து செயற்படுத்திய நாடகமாகக் கூட இருக்கலாம் என்ற சந்தேகங்களும் ஏற்பட்டுள்ளதாக கூறப்படுகின்றது.

அடுத்து கோத்தபாயவிற்கும் கைது ஆபத்து உள்ளதாகவும் கூறப்படுகின்றது. அரசியல் ரீதியான எதிரிகளாகவே வலம் வருகின்றனர் மகிந்த தரப்பினரும் ரணில் தரப்பினர்களும் என்பது வெளிப்படையாகவே தெரிந்த உண்மை.

இந்த நிலையில் தன்னை கைது செய்ய ரணில் உத்தரவிட்டுள்ளதாக இன்று ஊடகங்களுக்கு தெரிவித்த விமல் வாகன முறைக்கேடு தொடர்பிலேயே தான் கைது செய்யப்படப் போவதாகவும் குறிப்பிட்டிருந்தார்.

அதேபோல் விமல் நிதி மோசடி விசாரணை பிரிவு அலுவலகத்தில் முன்னிலையானதும் இன்று காலை. என்றாலும் இரண்டு நாட்களுக்கு முன்னரே விமல் கைது செய்யப்பட உள்ளார் என மகிந்த தெரிவித்திருந்தமை குறிப்பிடத்தக்கது.

இதன்படி விமலின் கைது ரணிலின் உத்தரவா? அல்லது மகிந்தவின் உத்தரவா என்பதும் சந்தேகமே. அதேபோன்று நிதி மோசடி விசாரணைப் பிரிவு எடுக்கும் முடிவுகள் நடைமுறைக்கு வரும் முன்னரே மகிந்த அறிந்து கொண்டது எப்படி?

விமலின் கைதினை முன்னரே அறிந்து கொண்ட மகிந்த தன் புதல்வர் நாமலின் கைதினை முன்னரே அறிந்து கொள்ள முடியவில்லையே.

நாமல் கைது செய்யப்பட்ட போது மகிந்த கூறியது “யாரை எப்போது இந்த நல்லாட்சியும் ரணிலும் கைது செய்வார்கள் என்பது தெரியாது, ரணிலின் இஸ்டம் போலவே நிதி மோசடி விசாரணைப் பிரிவு செயற்பட்டு வருகின்றது” என்பது.

என்றாலும் இப்போது மகிந்தவிற்கு ரணிலின் திட்டம் தெரிந்து போனது எவ்வாறு இந்தக் கேள்விக்கு ரணிலும் மகிந்தவும் மட்டுமே பதில் கூற முடியும்.

முன்னாள் ஜனாதிபதி என்ற செல்வாக்கு அவருக்கு இருக்கின்றது என்றால் நீதியும் கூட அவருக்கு கீழ் படிந்தா நடந்து வருகின்றது என்றும் ஓர் சந்தேகம் ஏற்பட்டுள்ளதாக கூறப்படுகின்றது.

அரசியல் ரீதியில் ஒருவருக்கு ஒருவர் எதிரிகளாகவே மகிந்தவும் ரணிலும் இருந்துவரும் நிலை தொடர்ந்து வருகின்றது.

ஆனாலும் இப்போது நடைபெற்ற விமலின் கைது பிரதமரின் திட்டமா அல்லது மகிந்தவின் திட்டமா இல்லை இருவரும் சேர்ந்து நடத்தும் நாடகமா என்ற வகையிலும் சிந்திக்கத் தூண்டுவதாக அரசியல் நோக்குனர்கள் தெரிவித்துள்ளனர்.

இதேவேளை வாகன முறைக்கேடு தொடர்பில் விமல் கைது செய்யப்பட வேண்டிய அவசியம் இப்போது வந்ததா? நல்லாட்சி வந்ததன் பின்னர் மாதாந்தம் விமல் குறித்த குற்றச்சாட்டுக்காக நிதி மோசடி விசாரணை வந்து சென்றதே அதிகம்.

ஆனால் இப்போது கைது செய்யப்பட்டுள்ளார் அதுவும் மகிந்த கூறியதைப்போலவே. இதே வகையிலான கைது ஒன்றே அண்மையில் முன்னாள் பிரதியமைச்சர் விநாயக மூர்த்தியின் கைதும் கூட.

இவற்றினை தொகுத்து நோக்கும் போது வெளியில் கீரியும் பாம்புமாக மோதிக் கொள்ளும் ரணில் மைத்திரி மகிந்த கூட்டுச் செயற்பாடுகளையே செய்து வருவதாக கூறப்படுகின்றது.

விமல் இன்று கைது செய்யப்பட உள்ளமை மகிந்த அறிந்திருந்தார். அதேபோன்று கோத்தபாய இன்று அதிகாலை அவசரமாக அமெரிக்காவிற்கு சென்று விட்டார்.

ஏற்கனவே கோத்தபாய லசந்த விக்ரமதுங்கவின் கொலை வழக்கில் விசாரணை செய்யப்பட உள்ளதாக செய்திகள் வெளி வந்த நிலையிலேயே கோத்தபாய வெளிநாட்டுக்கு பறந்து விட்டார்.

இதன் மூலம் கோத்தபாயவிற்கும் கைது ஆபத்து இருந்து அதன் காரணமாகவே அவர் அவசர வெளிநாட்டு பயணத்தை மேற்கொண்டுள்ளார் எனவும் தெரிவிக்கப்படுகின்றது.

எவ்வாறாயினும் இவை அனைத்துமே அரசியல் ரீதியான இலாபநோக்கு செயற்பாடுகள் மாத்திரமே எப்படியும் கைது செய்யப்பட்டவர் பிணையில் விரைவில் வெளிவருவார் என்றும் அரசியல் அவதானிகள் குறிப்பிட்டுள்ளமை சுட்டிக்காட்டப்படத்தக்கது.

யாழ். பல்கலைக்கழகத்தில் 32ஆவது பட்டமளிப்பு விழா இன்று சிறப்பாக இடம்பெற்றுள்ளது.

குறித்த பட்டமளிப்பு விழா நாளைய தினமும் தொடர்ந்து நடைபெறவுள்ளது.

இதேவேளை, பட்டமளிப்பு விழாவின் போது 2151 மாணவர்கள் பட்டங்களை பெற்று கொண்டுள்ளதாகவும் கூறப்படுகின்றது.

ஈரானில் இருந்து மருந்துப் பொருட்களை இறக்குமதி செய்வது தொடர்பில் ஆராய்ந்து வருவதாக சுகாதார அமைச்சு இன்று அறிவித்துள்ளது.

இந்த விடயம் தொடர்பில் இலங்கைக்கான ஈரான் தூதுவர் மொகமட் செய்ரி அமிரானியுடன் கலந்துரையாடல்கள் மேற்கொண்டுள்ளதாக சுகாதார அமைச்சர் வைத்தியர் ராஜித்த சேனாரத்ன தெரிவித்துள்ளார்.

இந்த விடயம் தொடர்பில் கருத்து தெரிவித்த இலங்கைக்கான ஈரான் தூதுவர்,

இலங்கைக்கு தேவையான மருந்துப் பொருட்கள் இறக்குமதி தொடர்பில் ஈரானிற்கு விஜயம் மேற்கொண்டு ஆராயுமாறு தெரிவித்துள்ளார்.

மேலும், ஈரானுக்கு விஜயம் மேற்கொள்ளுமாறு சுகாதார அமைச்சர் சேனாரத்னவிற்கு, ஈரான் தூதுவர் அழைப்பு விடுத்துள்ளார்.

இலங்கையில் முன்னாள் ஜனாதிபதி மகிந்த ராஜபக்ச அரசியலில் முக்கிய புள்ளி அவருக்கு அரசியல் ரீதியான செல்வாக்கு அண்மைக்காலமாக குறைந்து வருகின்றது.

அவர் மீது பல்வேறு வகையான விமர்சனங்களும் எழுப்பப்பட மக்கள் மத்தியில் அவருக்கு காணப்பட்ட செல்வாக்கு குறைந்து வருகின்றது.

இந்த காரணங்களினால் அவருடைய ஆதரவாளர்களும் கூட மகிந்த நல்லவரா? கெட்டவரா என்ற சந்தேகத்தை தோற்றுவிக்கும் நிலை உருவாகிவிட்டது.

ஆனாலும் மகிந்த தனது பழைய செல்வாக்கை மீட்டுக் கொள்ள அதிகாரத்தை, ஆட்சியை கைப்பற்ற கடுமையாக முயற்சித்து வருகின்றார் அத்தோடு வெளிப்படையான கருத்துகளையும் வெளியிட்டு வருகின்றார்.

இந்த நிலையில் அவருக்கு உதவும் வகையில் அவருடைய ஆதரவாளர்கள் மும்முரமாக இணைந்துள்ளார்கள்.

அந்தவகையில் மகிந்த எப்போதோ நடித்த திரைப்படத்தின் காணொளியை வெளியிட்டு, விவசாயத்திற்காக மகிந்த பாடுபட்டு வருவதை காட்டும் வகையில் விமர்சித்து வருகின்றனர்.

மகிந்த இலங்கையின் கலைத்துறைக்கு முக்கியத்துவம் கொடுத்து வரும் ஒருவர், அத்தோடு அம்பாந்தோட்டையில் விவசாய காணிகள் அந்நியர்களுக்கு கொடுக்கப்படுவதை தட்டிக் கேட்பவர் மகிந்தவே.

எமது தலைவருக்கு எதுவும் முடியும் என பலவகையில் மகிந்த இந்தக் காணொளி மூலமாக விமர்சிக்கப்படுகின்றார்.

இதேவேளை மகிந்த கடந்த காலத்தை மீட்டிப்பார்த்து அதனை மக்கள் மத்தியில் காட்டி ஆதரவு திரட்டும் வகையிலும் கலைஞர்களிடமும் ஆதரவு தேடும் வகையிலும் இந்த காணொளி மீண்டும் இப்போது பரப்பப்படுவதாக கூறப்படுகின்றமை குறிப்பிடத்தக்கது.

முன்னாள் பாதுகாப்பு செயலாளர் கோத்தபாய ராஜபக்ச இன்று அதிகாலை கட்டுநாயக்க விமான நிலையம் ஊடாக அமெரிக்கா நோக்கி சென்றுள்ளார்.

கோத்தபாய ராஜபக்சவின் அமெரிக்கா பயணத்தில் அவரது மனைவி அனோமா ராஜபக்சவும் இணைந்துள்ளார் என தெரிவிக்கப்படுகின்றது.

இன்று அதிகாலை 2.50 மணிக்கு டோஹா கட்டார் நோக்கி பயணித்த ஈ.கே.349 என்ற விமானத்தில் கோத்தபாய பயணித்துள்ளார்.

அமெரிக்காவில் தனது சொத்துக்கள் தொடர்பில் ஏற்பட்டுள்ள சில பிரச்சினைகளை தீர்த்துக் கொள்வதற்காக கோத்தபாய அமெரிக்க சென்றுள்ளதாக ராஜபக்ச குடும்ப தகவல் வட்டாரங்கள் தெரிவித்துள்ளது.

2015ம் ஆண்டு தெமட்டகொட பகுதியில் இளைஞர் ஒருவரை கடத்திச் சென்ற சம்பவம்தொடர்பிலான வழக்கு இன்றைய தினம் விசாரணைக்கு எடுத்துக்கொள்ளப்பட்டது.

இந்த வழக்கு தொடர்பில் குற்றஞ்சுமத்தப்பட்ட நாடாளுமன்ற உறுப்பினர் ஹிருணிக்காபிரேமசந்திர இன்றைய தினம் நீதிமன்றில் முன்னிலையாகவில்லை எனகுறிப்பிடப்பட்டுள்ளது.

ஹிருணிக்கா பிரேமசந்திரவிறகு சுகயீனம் காரணமாகவே அவர் நீதிமன்றில் முன்னிலையாகவில்லை என அவரது வழக்கறிஞர் இன்றைய தினம் நீதிமன்றில்அறிவித்துள்ளார்.

இந்த வழக்கு தொடர்பில் ஹிருணிக்கா உள்ளிட்ட ஒன்பது பேருக்கு எதிராக குற்றம்சுமத்தப்பட்டுள்ளது.

இருப்பினும்,ஏனைய எட்டு பேரும் இன்றைய தினம் நீதிமன்றில் முன்னிலையாகியுள்ளனர்.

2015ம் ஆண்டு டிசம்பர் மாதம் 21ம் திகதி தெமட்டகொட பகுதியில் இளைஞர்ஒருவர் கடத்திச் செல்லப்பட்டமை குறிப்பிடத்தக்கது.

வடக்கு மாகாண சபை ஆரம்பிக்கப்பட்ட காலம் முதல் இன்று வரை தேசிய ஒருமைப்பாட்டிற்கும் நல்லிணக்கத்திற்குமாகவே செயற்பட்டு வருகின்றது.

எந்த காலத்திலும் இனவாதம் பேசவில்லை. நாம் இனவாதம் பேசுகின்றோம் என ஹெல உறுமய வழக்கு தொடர்ந்தால் நாம் வழக்கை எதிர்கொள்ள தயாராகவுள்ளோம் என வடக்கு மாகாண சபை அவைத்தலைவர் சி.வி.கே.சிவஞானம் தெரிவித்தார்.

வடக்கு மாகாண சபை இனவாதம் பேசுவதை நிறுத்தவேண்டும் இல்லையேல் வழக்குத் தொடருவோம் என ஜாதிக ஹெல உறுமய எச்சரிக்கை விடுத்துள்ளமை தொடர் பில் கேட்டபோதே அவர் இதனைத் தெரிவித்தார்.

இது தொடர்பில் அவர் மேலும் தெரிவிக்கையில்,

வடக்கு மாகாண சபையில் நாம் எந்த காலத்திலும் இனவாதம் பேசவில்லை.

தெற்கில் உள்ள இனவாத ஊடகங்களும் இனவாத அரசியல் வாதிகளுமே மாகாண சபையின் பிரேரணைகளை நிறைவேற்றுவதை முழுமையாக ஆராயாது இனவாத செய்திகள் வந்ததும் அவர்களே இனவாதத்தை பேசுகின்றார்கள்.

தெற்கில் இருந்து உற்பத்தியாகும் கள்ளை வடக்கில் உள்ள கூட்டுறவு சங்கங்கள் விற்பனை செய்யவேண்டாம் என்பதே எமது கோரிக்கை.

குறிப்பாக வடக்கில் உள்ள பனை தென்னை கூட்டுறவு சங்கங்கள் தமது சமூகத்தை பாதுகாப்பதற்கு அதற்கேற்ப செயற்படவே உருவாக்கப்பட்டுள்ளன.

இதன் காரணமாக அத்தகைய பணியை செய்யவேண்டிய தேவை உள்ளது. கூட்டுறவாளர்கள் தமது செயற்பாட்டை செய்ய வேண்டும். இதன் மூலமே தமது நோக்கத்தை அடையவேண்டும்.

அதனைவிடுத்து தெற்கில் உள்ள கள்ளை கூட்டுறவு சங்கத்தில் விற்பதன் விளைவு பாதிப்பை ஏற்படுத்துவதால் கூட்டுறவு சங்கத்தில் அனுமதி மறுக்கப்பட்டது.

ஏனைய இடங்களில் விற்பதற்கு தடைசெய்யவில்லை.வடக்கு மாகாண சபைக்கான கீதம் அமைத்தலை பொறுத்தவரை அது அனைத்து மாகாணங்களிலுமுள்ள ஒன்றாகும் எமது சபையில் இல்லாது இருந்தது.

இதனை உருவாக்க முயற்சி எடுத்தால் அது வடக்கிற்கான தேசிய கீதம் என கூற முடியாது.இனவாத ஊடகங்கள் செய்தி வெளியிட்டவுடன் அந்தச் செய்தியை ஆராயாது வடமாகாண சபை தொடர்பில் பேசுவது முட்டாள் தனம்.

ஒரு விடயத்தை பேசவேண்டும் என்றால் அதனை ஆராய்ந்து செயற்படவேண்டும். இதை விடுத்து இனவாதத்தை தாங்களே செயற்படுத்தி விட்டு எம் மீது பழிபோடுவது விசமத்தனம்.

எம்மீது வழக்குப் போடுவது என்றால் போடட்டும். நாம் அதனை சட்ட ரீதியாக எதிர்கொள்வோம் என்றார்.