ஆஸ்திரேலிய கிரிக்கெட் அணி, இந்தியாவில் சுற்றுப்பயணம் செய்து 4 ஆட்டங்கள் கொண்ட டெஸ்ட் போட்டி தொடரில் விளையாடுகிறது. இதில் முதலாவது டெஸ்ட் போட்டி புனேயில் வருகிற 23-ந் தேதி தொடங்குகிறது. மும்பையில் நேற்று நடந்த நிகழ்ச்சி ஒன்றில் கலந்து கொண்ட இந்திய அணியின் முன்னாள் கேப்டன் சச்சின் தெண்டுல்கர், ஆஸ்திரேலியாவுக்கு எதிரான தொடர் குறித்து கருத்து தெரிவிக்கையில்,
‘எதிரணியை ஒருபோதும் குறைத்து மதிப்பிடக்கூடாது. ஆஸ்திரேலியா வலுவான அணியாகும். இந்திய சூழ்நிலையில் ஆடுவது கடினம் என்பதை அவர்களே ஒப்புக்கொண்டு இருக்கிறார்கள். இதனால் நாம் மெத்தனமாக இருந்து விடக்கூடாது. இந்த போட்டி தொடருக்கு இந்திய அணி சிறப்பாக தயாராகி இருக்கும் என்பதில் எனக்கு சந்தேகம் இல்லை. இருப்பினும் ஆஸ்திரேலிய அணியை கையாள்வது என்பது எளிதான காரியம் அல்ல. இந்திய அணி சிறப்பாக செயல்படும் என்று நம்புகிறேன்’ என்றார்.
