விஜய், கீர்த்தி சுரேஷ் மற்றும் பலர் நடிப்பில் உருவாகியிருக்கும் படம் ‘பைரவா’. ‘அழகிய தமிழ்மகன்’ புகழ் பரதன் இயக்கியிருக்கும் இப்படத்தை விஜயா வாஹினி புரொடக்ஷன்ஸ் நிறுவனம் பெரும் பொருட்செலவில் தயாரித்துள்ளது. முதன்முறையாக சந்தோஷ் நாராயணன் விஜய் படத்துக்கு இசையமைத்துள்ளார்.
இந்நிலையில் படத்தின் இறுதிக்கட்ட பணிகள் முடிவுக்கு வந்ததைத் தொடர்ந்து ‘பைரவா’ தணிக்கைக்கு அனுப்பி வைக்கப்பட்டது. படத்தைப் பார்த்த தணிக்கை அதிகாரிகள் ‘பைரவா’வுக்கு ‘யு’ சான்றிதழ் வழங்கினர். இதனைத் தொடர்ந்து ஜனவரி 12-ம் தேதி ‘பைரவா’ வெளியாகும் என படக்குழு அறிவித்துள்ளது.
ஆங்கில புத்தாண்டு தினத்தில் வெளியான ‘பைரவா’ டிரெய்லர் இணையத்தில் 5 மில்லியன் பார்வைகளைக் கடந்து சாதனை படைத்துள்ளது குறிப்பிடத்தக்கது.
