கடும் மழையுடனான வானிலை காரணமாக கண்டி (Kandy) – பொல்கொல்ல மகாவலி நீர்த்தேக்கத்தில் இரண்டு வான் கதவுகள் திறக்கப்பட்டுள்ளன.
நீர்த்தேக்கத்தின் இரண்டு வான் கதவுகளும் தலா ஒரு மீற்றர் அளவில் திறக்கப்பட்டுள்ளதாக இலங்கை மகாவலி அதிகார சபைக்கு பொறுப்பான பொறியியலாளர் தெரிவித்துள்ளார்.
தெதுரு ஓயா நீர்த்தேக்கம்
ஒரு வான்கதவில் இருந்து வினாடிக்கு சுமார் 140 கன மீற்றர் நீர், விக்டோரியா நீர்த்தேக்கத்திற்கு திறந்து விடப்படுவதாக இலங்கை மகாவலி அதிகார சபை தெரிவித்துள்ளது.
இதேபோல், தெதுருஓயா நீர்த்தேக்கத்தின் எட்டு வான் கதவுகளில் ஆறு இன்று (09) காலை திறக்கப்பட்டதாக நீர்த்தேக்க நீர்ப்பாசன பொறியியலாளர் கயான் வீரசூரிய தெரிவித்துள்ளார்.
திறக்கப்பட்ட ஆறு கதவுகளில், நான்கு கதவுகள் தலா 5 அடியும், இரண்டு கதவுகள் தலா 2 அடியும் திறக்கப்பட்டுள்ளது.
இதன்காரணமாக தெதுரு ஓயா நீர்த்தேக்கத்திலிருந்து வினாடிக்கு 16600 கன அடி வீதம் தண்ணீர் திறந்துவிடப்படுவதுடன் தெதுரு ஓயாவின் தாழ்வான பகுதிகளில் வசிக்கும் மக்கள் மற்றும் தெதுரு ஓயாவைச் சூழவுள்ள மக்கள் தொடர்பில் உரிய கவனம் செலுத்தப்படும் எனவும் பொறியியலாளர் குறிப்பிட்டுள்ளார்.
